Taleh Heydərovun hegemonluğu - Fövqəl nazirin oğlu kitab mağazalarına hücuma keçib - VİDEO


Taleh Heydərovun hegemonluğu - Fövqəl nazirin oğlu kitab mağazalarına hücuma keçib - VİDEO
“4 il əvvəl “Gilan” Holdinqin nümayəndəsi məni mərkəzi ofisə dəvət etdi. Sizin adınızdan dedi ki, “Əli və Nino”nu bizə verməlisən: “Əgər verməsən, biz fil, sən isə qarışqa – səni əzəcəyik”. Realliqinfo.org xəbər verir ki, bu sözləri “Əli və Nino” kitab mağazaları şəbəkəsinin sahibəsi Nigar Köçərli fövqəladə hallar naziri Kəmaləddin Heydərova ünvanladığı müraciətində deyir.

N.Köçərli “Facebook” səhifəsində yayımladığı videomüraciətdə deyir ki, o vaxtdan “Əli və Nino”ya qarşı mənəvi terror başlayıb: “Gömrükdə problemlər, mağazalarımda gizli çəkilişlər, işçilərin doprosları, mətbuatda və sosial şəbəkələrdə əleyhimə kampaniyalar… Bu, bəs etmədi, indi də “Əli və Nino” kitab dükanları mollardan çıxarılır. Sizin adamlar bizi bu dükanlardan qovur, yerində öz kitab dükanlarını yaradırlar”.
Sahibkar qadın deyir ki, dəfələrlə nazirin oğluna müraciət etsə də, bir nəticəsi olmayıb:
Taleh Heydərovun hegemonluğu - Fövqəl nazirin oğlu kitab mağazalarına hücuma keçib - VİDEO
“Cənab Nazir, mən dəfələrlə Tale Heydarova məktub yazmışam, amma heç bir nəticə olmayıb. Mən dəfələrə köməkçiləriniz vasitəsilə sizə xəbər göndərmişəm. Heç bir nəticə olmayıb. Bəlkə də sizin bunlardan xəbəriniz yoxdur.
Mən kitab biznesinə 15 il əvvəl 600 dollarla başlamışam. Beynəlxalq təşkilatda işləyirdim, maaşdan qənaət etmişdim. O vaxt Bakıda yalnız 2 kitab dükanı var idi, digərləri bağlanmışdı.
Mollarda, ticarət mərkəzlərində kitab dükanları açdıq və kitab gənclərimizin həyatına qayıtdı. Bu gün bizim ardıcıl kitab təbliğatımız, parklarda keçirtdiyimiz endirimli kitab yarmarkalarının sayəsində oxucuların sayı xeyli artıb. Mütaliyə səviyyəsini artırmaq üçün Milli Kitab Mükafatı təsis etmişəm. Bununla da ədəbiyyat mətbuatın gündəminə qayıtdı. Biz bu işə görə heç kəsdən mükafat gözləmədik. Eyni zamanda bizə vurulan indiki qəddar zərbəni də gözləmirdik.
Taleh Heydərovun hegemonluğu - Fövqəl nazirin oğlu kitab mağazalarına hücuma keçib - VİDEO
Mən həmişə öz işimdən fəxrlə danışmışam. Çünki mən bu işi böyük sevgi və böyük zəhmət ilə qurmuşam.
Sizin ailə kitab biznesinə başlayanda düşündüm ki, nəhayət, Azərbaycanın ucqar yerlərində, heç bir kitab dükanı olmayan rayonlarda kitab dükanları və pulsuz ictimai kitabxanalar açacaqsınız. Oxu mədəniyyətinin inkişafına dəstək verəcəksiz. İmkansız insanlara pulsuz kitab paylayacaqsınız. Axı sizin imkanlarınız bizdən milyon dəfə böyükdür. Gözləntim özünü doğrultmadı. Görünür, kitabsız yerlərə getmək çətin oldu. Amma “Əli və Nino”nu bağlayıb, yerində öz kitab mağazalarını açmaq asandır.
Cənab nazir, Tale Heydərov vargücü ilə və bizi adam yerinə qoymadan, nifrətlə, saymazyana, dükanlarımızın bağlanmasına çalışır”.

N.Köçərli deyir ki, bir müddət öncə qardaşı da Heydərovların təzyiqi ilə üzləşib:

“Mənim qardaşım bir vaxtlar kredit götürməklə Göyçayda nar şirələri istehsal edən mini-zavod açmışdı. Sizin adamlar o zavodu onun əlindən zorla aldılar, qardaşım müflis oldu. O vaxtdan xeyli keçib. Belə çıxır ki, növbə mənə çatdı. Sizin oğlunuz mənim dükanlarımı əlimdən alır.
.......
Mən sizə Azərbaycanda bizneslə məşğul olan tək-tük qadınlardan biri kimi müraciət edirəm. Əlbəttə, mənim arxamda böyük pullar və böyük adamlar yoxdur. Amma mənim arxamda, bir Azərbaycan qadınının böyük zəhməti, vicdanlı və halal əməyi durur.
Sizdən xahiş edirəm ki, öz adamlarınıza deyəsiniz ki, məndən əl çəksinlər”.

Müraciətə qarşı tərəfdən hələlik hər hansı reaksiya yoxdur.
Realliqinfo.org


  • 13.02.2018, 02:20, Oxunub: 10 745
  • * Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.
    Şərh et
    Saygaclar